Mae Rhun ap Iorwerth wedi cynrychioli Ynys Môn yn Senedd Cymru ers mis Awst 2013, ac mae'n Arweinydd Plaid Cymru ers Mehefin 2023.
Cyn hynny bu’n newyddiadurwr a darlledwr am bron i 20 mlynedd. Wedi graddio mewn Gwleidyddiaeth a Chymraeg ym Mhrifysgol Caerdydd, ymunodd â’r BBC yn 1994. Treuliodd gyfnod yn San Steffan, cyn dychwelyd i Gymru, lle bu’n Brif Ohebydd Gwleidyddol, yn ohebydd rheolaidd i deledu Rhwydwaith y BBC, yn ogystal âg yn gyflwynydd nifer fawr o raglenni teledu a radio yn Gymraeg a Saesneg, o newyddion a gwleidyddiaeth i raglenni celfyddydol a hanes.
Cafodd ei fagu ar Ynys Môn, ac mae’n byw ar yr ynys gyda’i wraig Llinos, ac yma y gwnaethon nhw fagu ei 3 plentyn.
Ers ei ethol gyntaf, mae Rhun wedi treulio cyfnodau fel Gweinidog Cysgodol Dros yr Economi a Thrafnidiaeth, Iechyd a Gofal, a Chyllid, ac fel aelod o’r pwyllgorau cyfatebol yn y Cynulliad a’r Senedd. Bu hefyd yn aelod ar wahanol adegau o’r Pwyllgorau Cyfrifon Cyhoeddus, Deisebau a Safonau, yn ogystal ag yn un o Gomisiynwyr y Senedd.
Mae ei ddiddordebau y tu allan i wleidyddiaeth yn cynnwys cerddoriaeth, chwaraeon a theithio. Bu'n hyfforddi ieuenctid yng Nghlwb Rygbi Llangefni am ddeng mlynedd, ac mae'n rhedeg a beicio i gadw'n heini. Mae'n dweud ei fod yn cyfansoddi a chwarae nifer o offerynnau yn wael!
I ddarganfod mwy am waith Rhun dros bobl Ynys Môn cliciwch yma (rhunapiorwerth.cymru)
Swyddfa Etholaeth
1b Stryd yr Eglwys
Llangefni
Ynys Môn
LL77 7DU
Ffôn: 01248 723599
Swyddfa Senedd
Senedd Cymru
Bae Caerdydd
Caerdydd
CF99 1NA