Mae Llinos Medi wedi bod yn Gynghorydd Sir Ward Talybolion ers 2013 ac yn 2019 daeth yn Arweinydd ar Gyngor Sir Ynys Môn; y ferch gyntaf erioed i arwain y Cyngor.
Mae'n arwain Grŵp Plaid Cymru o fewn Cymdeithas Llywodraeth Leol Cymru ac hefyd yn Lefarydd CLlLC ar Wasanaethau Cymdeithasol.
Hogan o Fôn ydi Llinos, wedi ei magu ar fferm ym mhentref Llanddona ac wedi treulio ei bywyd addysgol ar yr ynys yn Ysgol Gynradd Llanddona, Ysgol David Hughes ac yna Coleg Pencraig yn Llangefni cyn symud i fyd gwaith mewn sawl swydd ar hyd a lled yr ynys.
Bu'n ofalwraig mewn Cartrefi Preswyl y Cyngor ac yn Weithiwr Ieuenctid gyda Chlybiau Ieuenctid yr ynys - dwy swydd sydd wedi dylanwadu’n fawr ar ei gweledigaeth gwleidyddol.
Cafodd Llinos ei henwi ar restr o 100 o Ferched Cymru sydd wedi cael effaith arwyddocaol o fewn eu meysydd, rhestr a luniwyd gan y Rhwydwaith Cydraddoldeb Menywod yn 2020.
Yn ôl arolwg barn gan Survation ym mis Chwefror 2024, Llinos Medi yw'r ffefryn i ennill sedd Ynys Môn oddi ar y Ceidwadwyr gyda 39% o’r bleidlais. Roedd Llafur ar 27%, y Ceidwadwyr ar 26% a Reform ar 4%.
Mae Llinos yn gobeithio ymuno â thîm gweithgar Plaid Cymru yn San Steffan, ac yn credu bod angen llais ar Ynys Môn a fydd bob amser yn sefyll dros wir anghenion a gwerthoedd yr Ynys.