Rhun ap Iorwerth yn cynnal digwyddiad yn y Senedd i nodi Wythnos Hydrogen y Byd ac yn galw ar Lywodraeth Cymru am strategaeth hydrogen
Ddoe yn y Senedd (10/10/23) noddodd Rhun ap Iorwerth, Aelod o’r Senedd dros Ynys Môn ac Arweinydd Plaid Cymru ddigwyddiad llwyddiannus i nodi dathliadau byd-eang o dechnoleg hydrogen, a oedd hefyd yn tynnu sylw at botensial y diwydiant hydrogen yng Nghymru.
Roedd y digwyddiad, a drefnwyd gan HyCymru (Cymdeithas Masnach Hydrogen Cymru) yn tynnu sylw at brosiectau a datblygiadau hydrogen Cymru – gan gynnwys Hwb Hydrogen Caergybi Menter Môn, ond hefyd yn cynnwys cyfraniadau gan siaradwyr rhyngwladol - gan gynnwys cyflwyniadau gan Germany Trade & Invest a thrafodaeth am Economi Hydrogen y Ffindir gan Flexens. Roedd hefyd arddangosfa o gerbydau technoleg hydrogen gan gynnwys ceir a bysiau masnachol y tu allan i Ganolfan y Mileniwm ym Mae Caerdydd i gyd-fynd â’r digwyddiad.
Mae gan hydrogen rôl hanfodol i’w chwarae yn natgarboneiddio ac ymateb i sialensau amgylcheddol, ac mae’n darparu cyfleoedd twf economaidd gwyrdd enfawr. Yn dilyn y digwyddiad, galwodd Rhun ap Iorwerth ar Lywodraeth Cymru am strategaeth a fyddai'n manteisio ar botensial Cymru yn y diwydiant, a chroesawodd ymateb Lesley Griffiths AS, Trefnydd Llywodraeth Cymru a Gweinidog Gogledd Cymru, pan iddi gytuno bod yna ‘gyfle enfawr' yn y sector hydrogen i Gymru.
Wrth siarad ar ôl y digwyddiad, dywedodd Rhun ap Iorwerth AS:
“Rwy’n gyffrous am botensial y diwydiant hydrogen yng Nghymru – mae cymaint o gyfle yma i greu swyddi, yn ogystal ag i ymateb i heriau amgylcheddol.
“Roeddwn yn falch iawn o noddi’r digwyddiad a’r arddangosfa wythnos yma, gan roi cyfle i edrych ar sut y gallwn ddatgloi’r potensial hwnnw. Ymunodd cynrychiolwyr o fusnesau a llywodraethau o bob rhan o’r byd efo ni – a braf oedd cael y cyfle i wrando ar yr arbenigwyr hynny ar sut i ddatblygu’r hyn sydd gennym yma, ac i glymu’r datblygiadau Cymreig i’r darlun hydrogen rhyngwladol.
“Mae gennym ni’r adnoddau naturiol, mae gennym ni’r porthladdoedd, y seilwaith, y cyfleoedd ymchwil, ac mae gennym ni gefnogaeth gan Lywodraeth Cymru ar yr egwyddor o ddatblygu hydrogen, ond yr hyn sydd ei angen arnom yw symud hynny ymlaen fel ei fod yn dod yn rhywbeth sydd wirioneddol gadarn, drwy gynllun clir i symud y sector yn ei flaen. Rwy’n falch bod y Gweinidog yn cytuno â mi ac yn edrych ymlaen at ddatganiad pellach gan y llywodraeth.”