Roedd yn fraint cyfarfod yn ddiweddar â Phil Roberts, ymgyrchydd lleol angerddol sy’n rhoi ei amser ac arian i godi ymwybyddiaeth am ganser y prostad.
Bob mis Mawrth am y pedair blynedd diwethaf, mae Phil wedi ymgymryd â her bersonol - cerdded 11,000 o gamau bob dydd trwy gydol y mis i godi ymwybyddiaeth am afiechyd sy'n effeithio ar 1 o bob 8 dyn yn y DU. Eleni yn unig, cerddodd dros 400,000 o gamau.
Ond nid dyna'r oll. Wrth iddo gerdded, mae’n gosod posteri o amgylch ei bentref, Llanfairpwll, yn benderfynol o wneud yn siŵr bod cymaint o bobl â phosibl yn clywed ei neges: mae diagnosis cynnar yn achub bywydau.
Gofynnodd i mi helpu i ledaenu’r neges honno ymhellach ac rwy’n falch o wneud hynny.
Pam bod hyn yn bwysig
Yng Nghymru, mae tua 2,600 o ddynion yn cael diagnosis o ganser y prostad bob blwyddyn. Dyma’r canser mwyaf cyffredin mewn dynion, ond mae canfod yn gynnar yn gwneud gwahaniaeth enfawr.
Un o’r ystadegau sy’n peri’r pryder mwyaf yw bod 19% o ddynion Cymru’n cael diagnosis rhy hwyr ar gyfer triniaeth. Mae hynny bron i 1 o bob 5 dyn a allai golli allan ar ofal achub bywyd, yn aml oherwydd nad yw’r symptomau’n amlwg neu oherwydd eu bod yn teimlo’n ansicr am ofyn am gyngor.
Mae angen mwy o ymwybyddiaeth arnom. Boed yn meddwl am eich iechyd eich hun, yn annog ffrind, neu’n dechrau sgwrs, nawr yw’r amser i siarad am ganser y prostad.
Dysgu mwy a chael cefnogaeth
Os ydych chi eisiau gwybod mwy, os oes gennych chi bryderon am symptomau, neu ddim ond eisiau cefnogi'r achos, gallwch chi fynd i: 👉 www.prostatecanceruk.org
Beth am i ni helpu i sicrhau bod mwy o ddynion ar draws Ynys Môn a Chymru yn cael y cymorth a’r diagnosis cynnar sydd eu hangen arnynt.