Mae hi’n flwyddyn bellach ers i Blaid Cymru ddod i rym unwaith eto ar Gyngor Sir Ynys Môn ac ers i Llinos Medi gael ei hethol yn Arweinydd y Cyngor yn dilyn etholiadau hynod llwyddiannus mis Mai 2022.
"Fel Cyngor rydym wedi ymrwymo i ddarparu’r gwasanaethau gorau bosib i holl drigolion yr ynys er gwaetha’r sefyllfa economaidd a’r argyfwng costau byw heriol sydd yn wynebu pob un ohonnom ni," meddai Llinos.
Wrth ymgyrchu llynedd roedd neges gref ar garreg y drws bod trigolion Môn yn poeni am yr argyfwng dai ac roedd ein neges o sicrhau fod gan pawb yr hawl i alw rhywle’n adref yn taro tant. Fel rhan o’r weledigaeth honno rydym wedi manteisio ar yr hawl i godi premiwm Treth Cyngor ar ail dai ar yr ynys.
"Gyda’r arian o’r premiwm yma rydym wedi dod â thai gwag yn ôl i ddefnydd, wedi prynnu cyn dai Cyngor er mwyn dod a nhw yn ôl i stoc yr Awdurdod ac wedi sefydlu cronfa ar gyfer benthyciadau rhannu ecwiti fydd yn helpu pobl lleol i allu cael troed ar yr ysgol dai."
"Mae’r strategaeth yma o alluogi pobl sy’n gallu fforddio mwy nac un tŷ i roi cymorth i’r rhai sydd methu fforddio yr un tŷ yn holl bwysig os ydym ni am sicrhau tai lleol i bobl Môn," ychwanegodd.
Un oedd yn daer o blaid y cynlluniau yma oedd ein cyfaill annwyl, y cyn Gynghorydd Alun Mummery, a fu farw ym mis Rhagfyr llynedd.
"Ni allaf adael y cyfle yma fynd heibio heb dalu teyrnged i ŵr bonheddig wnaeth cymaint dros ei gymuned, dros yr Ynys a dros Blaid Cymru," meddai Llinos.
Bu i Sonia Williams gadw sedd Alun ar ran Plaid Cymru mewn is etholiad yn Ward Aethwy ym mis Mawrth gan addo i barhau â’r gwaith da a gafodd ei wneud gan Alun. Gyda 21 o Gynghorwyr Plaid Cymru yn gweithio’n galed dros fuddianau’r Ynys rydym yn ffyddiog gallwn wneud gwahaniaeth hir dymor i wasanaethau’r Cyngor gyda’r nôd o greu Ynys Môn fydd yn iach ac yn llewyrchus lle gall pob un ffynnu.