Mae Plaid Cymru Ynys Môn wedi galw ar Lywodraeth Cymru i gynnal adolygiad brys o wytnwch cysylltiad Ynys Môn a’r tir mawr.
Mewn cyfarfod llawn o Gyngor Sir Ynys Môn, dywedodd yr Arweinydd, Llinos Medi, fod Ynys Môn yn unigryw i unrhyw ardal arall yng Nghymru oherwydd dim ond dau gyswllt sy'n bodoli rhwng yr ynys a'r tir mawr.
"'Da ni'n sôn am gallu trigolion yr ynys i fyw eu bywydau o ddydd i ddydd," meddai. "Mae cael mynediad i waith, addysg a gwasanaethau brys a dyfodol economaidd a llesiant trigolion yr ynys yn ddibynnol ar y cysylltiad."
Daw'r galw yn sgîl penderfyniad llywodraeth Cymru i ganslo cynlluniau am drydydd croesiad yn dilyn adolygiad o Gynllun Trafnidiaeth Cenedlaethol Llywodraeth Cymru.
"Mae angen ystyried ffactorau economaidd hefyd," ychwanegodd. "Mae'n hanfodol i'r sector twristiaeth ac mae'n rhaid cofio mai Porthladd Caergybi yw'r ail borthladd prysuraf y Deyrnas Unedig."
"Er pa mor hardd ydy hi, heneiddio mae Pont Menai, felly mae angen sicrhau'r gwytnwch y cysylltiad â'r tir mawr ar gyfer pobl Môn wrth edrych tua'r dyfodol."
Dywedodd y Dirprwy Arweinydd, y Cynghorydd Robin Williams, sy'n cynrychioli Ward Aethwy, fod tagfeydd traffic sy'n deillio o gau un o'r pontydd yn creu problemau anferthol.
"Pan fo Pont Britannia ar gau oherwydd gwyntoedd cryfion neu pan fo Pont Menai ar gau oherwydd gwaith cynnal a chadw yn ddiweddar, mae ardaloedd Llanfairpwll a Phorthaethwy yn troi'n feysydd parcio wrth i bobl methu'n glir a chroesi drosodd i'r tir mawr."
"Mae'n rhaid i Lywodraeth Cymru edrych eto ar wytnwch y cysylltiad dros y Fenai."